Uşaqlarda qarın ağrısı hər zaman sadə həzm problemi ilə əlaqəli olmur. Bəzi hallarda bu əlamət təcili tibbi müdaxilə tələb edən ciddi xəstəliklərin xəbərçisi ola bilər.
Sosialmedia.az xarici mediaya istinadən bildirir ki, uşaq cərrahı Dr. Mehmet Şerif Arslanın sözlərinə görə, qarın ağrısı qəbizlik kimi yüngül səbəblərdən yaransa da, appendisit və bağırsaq tıxanması kimi həyati risk yaradan vəziyyətlərlə də əlaqəli ola bilər.
Mütəxəssis xüsusilə həyatın ilk ilində olan körpələrdə qəfil başlayan və şiddətli xarakter daşıyan qarın ağrılarına diqqət yetirilməsinin vacibliyini vurğulayıb. Onun sözlərinə görə, belə hallarda bağırsaq tıxanması ehtimalı nəzərə alınmalıdır.
Dr. Arslan bildirib ki, bağırsaq tıxanması adətən qəfil başlayan güclü qarın ağrısı və öd tərkibli qusma ilə özünü göstərir. Diaqnozun qoyulması üçün əksər hallarda ultrasəs müayinəsi kifayət edir və erkən aşkarlandıqda xəstələrin böyük hissəsi əməliyyata ehtiyac olmadan müalicə oluna bilir.
Mütəxəssis valideynlərə tövsiyə edir ki, uşaqda şiddətli və ya davamlı qarın ağrısı, təkrarlanan qusma, yüksək hərarət, qarında şişkinlik və ya ümumi vəziyyətin pisləşməsi müşahidə olunarsa, vaxt itirmədən həkimə müraciət etsinlər.
120 views