Azərbaycanda bank sektorunun izafi likvidliyi 2026-cı ilin avqust ayının sonuna 6,3 milyard manata çatıb. Bu göstərici ötən ilin dekabr ayı ilə müqayisədə 2,2 dəfə artıb. Lakin bankların sərəncamında vəsaitlərin artmasına baxmayaraq, kredit faizlərində azalma müşahidə olunmur.
Sosialmedia.az xəbər verir ki, Mərkəzi Bankın məlumatına görə, məcburi ehtiyatlar nəzərə alınmadan bank sektorunun struktur likvidlik profisiti avqustun sonunda 6,3 milyard manat təşkil edib.
İqtisadçı Xalid Kərimlinin sözlərinə görə, bankların sərəncamında vəsaitlərin artması kredit faizlərinin aşağı salınması üçün imkan yaratsa da, bu tendensiya praktikada özünü göstərmir. Onun fikrincə, izafi likvidliyin təsiri daha çox depozit faizlərinin azalmasında hiss olunur.
İqtisadçı bildirib ki, banklar kredit faizlərini aşağı salmaqla daha çox müştəri cəlb edəcəklərinə əmin deyillər. Eyni zamanda, faizlərin aşağı salınmasının problemli kreditlərin artmasına səbəb ola biləcəyindən ehtiyat edirlər.
Mərkəzi Bankın məlumatları da kredit faizlərində azalma olmadığını göstərir. Belə ki, yeni verilmiş kreditlərin orta faiz dərəcəsi 2026-cı ilin əvvəlində 17,69 faiz olduğu halda, sentyabrda 18,83 faizə yüksəlib.
Digər tərəfdən, yüksək kredit faizləri problemli kreditlərin artımının qarşısını almayıb. Sentyabrın 1-nə olan məlumata görə, problemli kreditlərin məbləği ilin əvvəli ilə müqayisədə 37,6 faiz artıb.
Beləliklə, bank sektorunda izafi likvidliyin əhəmiyyətli dərəcədə artması kreditlərin ucuzlaşmasına gətirib çıxarmayıb. Bankların sərəncamında daha çox vəsaitin olması ilə yanaşı, kredit riskləri və borcalanların ödəmə qabiliyyəti də bankların faiz siyasətinə təsir edən əsas amillər olaraq qalır.
154 views