Sosialmedia.az xəbər verir ki , Bakı Dövlət Universitetinin Beynəlxalq Münasibətlər və İqtisadiyyat fakültəsinin tələbəsi, Azərbaycan Gənclər Fondun maddi dəstəyi ilə keçirilən “İdeyanı Reallaşdır 2023” Fərdi Qrant Müsabiqəsinin qalibi Teymur Talışxanov tərəfindən “Miqrasiya Könüllüsü” İctimai Birliyinin, Azərbaycan Respublikası Dövlət Miqrasiya Xidmətinin təşkilati dəstəyi və Bakı Dövlət Universtetinin Tələbə Gənclər Təşkilatının və “AzMUN” Proqramının tərəfdaşlığı ilə “Diplomats’ Union” layihəsi həyata keçirilib.
“Diplomats’ Union” layihəsi diplomatiya və siyasət sahəsində gənclərə baza bilikləri qazandırmağı və danışıqların düzgün aparılması kimi diplomatlar üçün vacib olan bacarıqları inkişaf etdirməyi hədəfləyirdi. Layihə tamamilə ingilis dilində keçirilmişdi və beynəlxalq münasibətlər, diplomatiya və politologiya sahələrindən mütəxəssislər təlimçi qismində dəvət olunmuşdu.
Layihə həm nəzəri, həm də praktiki biliklərin təkmilləşdirilməsi məqsədini daşıyırdı. İlk dörd gün nəzəri və praktiki təlimlərə həsr olundu, sonuncu gün isə iştirakçılar əldə etdikləri bilikləri Bakı Dövlət Universitetində keçirilən BMT modeli simulyasiya konfransında (MUN – Model of United Nations) tətbiq edə bildilər.
Layihədə diplomatiyaya marağı olan, 18-26 yaş arası, müsahibə yolu ilə seçilmiş 20 gənc iştirakı etmək fürsəti qazandı. Təlimlər bir ay müddətində peşəkar mütəxəssislər tərəfindən keçirilib və əsasən diplomatiya və beynəlxalq münasibətlər mövzularını əhatə etdi. Layihənin əsas məqsədi gənclərin diplomatiya ilə bağlı biliklərini artırmaq, karyera planları haqqında məsləhətlər vermək və onların inkişafına dəstək olmaq idi.
