Əlilliyi Olan Şəxslərin Sosial Müdafiəsinə və İnteqrasiyasına Dəstək İctimai Birliyi tərəfindən təşkil olunan sosial tədbir çərçivəsində bir qrup təşkilat üzvü üçün Sumqayıt şəhərində açıq havada görüş keçirilib.
Bu barədə Sosialmedia.az-a ƏSMİD İctimai Birliyinin sədri Səbinə Kərimova məlumat verib.Onun sözlərinə görə, tədbirin əsas məqsədi əlilliyi olan şəxslərin yay aylarında istirahətinin təmin olunması, onların asudə vaxtlarının səmərəli və maraqlı şəkildə təşkil edilməsidir.
Görüş zamanı iştirakçılar üçün müxtəlif əyləncəli oyunlar, maarifləndirici söhbətlər və gəzintilər təşkil olunub. Bu cür sosial tədbirlər, əlilliyi olan şəxslərin cəmiyyətə inteqrasiyasının gücləndirilməsi və onların sosial həyata daha aktiv cəlb olunması baxımından mühüm əhəmiyyət daşıyır.
Qeyd etmək lazımdır ki, əlillik yalnız fiziki və ya psixoloji vəziyyət deyil, həm də fərqli ehtiyacları olan bir həyat tərzidir.
Bu həyat tərzini daha rahat və əlçatan etmək, əlilliyi olan insanların hüquqlarının qorunmasına, rifahının yaxşılaşdırılmasına və cəmiyyətin fəal üzvləri kimi çıxış etmələrinə dəstək göstərmək hər birimizin vəzifəsidir.
Bu kontekstdə, belə tədbirlərin təşkili əlilliyi olan şəxslərin həyat keyfiyyətinin yüksəldilməsinə, onların səyahət və sosial təcrübələrinin zənginləşdirilməsinə, eyni zamanda ictimai iştirakçılıqlarının artırılmasına töhfə verir.
