WhatsApp iOS tətbiqində Liquid Glass dizaynını təkmilləşdirən yeni naviqasiya düyməsi istifadəyə verilməyə başlayıb. Yenilik istifadəçilərə kontakt məlumatlarına və tez-tez istifadə olunan söhbət funksiyalarına daha rahat çıxış imkanı yaradır.
Sosialmedia.az xəbər verir ki, QHT.az xarici mediaya istinadən yayılan məlumata görə, dəyişiklik WhatsApp-ın 26.39.75 versiyasında aşkarlanıb. Yeniliyin əsas məqsədi söhbət ekranında kontakt məlumatlarının daha aydın görünməsini təmin etmək və tətbiqin əsas funksiyalarına çıxışı asanlaşdırmaqdır.
Apple-ın Liquid Glass interfeys konsepsiyasına əsaslanan yeni dizaynda yarı şəffaf elementlərdən istifadə olunur. Lakin bu elementlər bəzi hallarda söhbət fonunda kontakt adlarının oxunmasını çətinləşdirə bilər. Yeni naviqasiya düyməsi profil şəklini, kontaktın adını, onlayn statusunu və ya son görülmə məlumatını vahid interfeys elementində birləşdirir.
Düyməyə toxunduqda ekranın yuxarı hissəsində yarı şəffaf menyu açılır. Bu menyu vasitəsilə istifadəçilər müxtəlif söhbət funksiyalarına birbaşa daxil ola bilirlər.
Fərdi yazışmalarda yeni menyu axtarış, əlaqə məlumatları, media və sənədlər, söhbət mövzusu, yox olan mesajlar və bildirişləri səssizə alma seçimlərini əhatə edir. Beləliklə, həmin funksiyalardan istifadə etmək üçün hər dəfə ayrıca söhbət məlumatları bölməsinə keçməyə ehtiyac qalmır.
Qrup söhbətlərində isə bu imkanlarla yanaşı, yeni üzvlərin əlavə edilməsi funksiyası da təqdim olunur. Biznes hesabları ilə yazışmalarda da hesab növünə uyğun seçimlər nəzərdə tutulub.
Qeyd edək ki, yenilik hələlik bütün istifadəçilər üçün əlçatan deyil. Funksiya Liquid Glass dizaynını aktivləşdirmiş müəyyən hesablar üçün mərhələli şəkildə istifadəyə verilir.
73 views