Üçüncü SMM təlimi: Rəqəmsal kimlik və brend quruculuğu mövzusunda yeni biliklərSosialmedia.az xəbər verir ki, “Əlilliyi Olan Şəxslərin Sosial Müdafiəsinə və İnteqrasiyasına Dəstək” İctimai Birliyi tərəfindən, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Rəqəmsal İnkişafla Məşğulluq Yarat” layihəsinin növbəti – üçüncü təlimi uğurla keçirilib.
Bu dəfəki təlimin mövzusu “Rəqəmsal kimliyin formalaşdırılması” olub. Təlimdə iştirakçılar sosial media platformalarında fərdi və ya biznes brendinin necə qurulması, bu brendin rəqəmsal məkanda tanınması üçün effektiv üsullar barədə ətraflı məlumat əldə ediblər. Təlimçi Pərvanə Fərhadqızı bildirib ki, brendinq yalnız bir loqo və ya şüarla kifayətlənmir – bu, tamaşaçılarla emosional və strateji əlaqə yaratmaq bacarığıdır.
Təlim zamanı müzakirə olunan əsas mövzular:
Rəqəmsal brendin formalaşması və inkişafı
Sosial mediada düzgün mövqe tutmaq
Effektiv reklam alətləri və strategiyaları
Onlayn platformalarda biznes imkanlarının dəyərləndirilməsi
Təlim interaktiv şəkildə aparılıb və iştirakçılar praktik məşğələlər vasitəsilə əldə etdikləri bilikləri tətbiq etmək imkanı qazanıblar.
Layihənin əsas hədəfi — əlilliyi olan şəxslərin rəqəmsal bacarıqlarını gücləndirərək onların əmək bazarına inteqrasiyasını və sosial-iqtisadi həyatda aktiv iştirakını təmin etməkdir.
Təlimlər mərhələli şəkildə davam etdiriləcək və iştirakçılar gələcək mərhələlərdə öz biliklərini real iş mühitində tətbiq etmək şansı əldə edəcəklər.
