Həddindən artıq istilik orqanizmin qocalmasını sürətləndirir və istilik dalğalarının təsiri siqaret, alkoqol və oturaq həyat tərzinin mənfi təsiri ilə müqayisə edilə bilər.
Sosialmedia.az xəbər verir ki, bu nəticəyə araşdırmalar zamanı Honq Konq Universitetinin alimləri gəlib.
Tədqiqatda 25–80 yaş arası təxminən 25 min Tayvan sakini iştirak edib. Məlumatlar 15 il ərzində toplanıb, hər iştirakçı orta hesabla 6,3 il müşahidə olunub.
Alimlər xronoloji yaşla bioloji yaş arasındakı fərqi izləyiblər. Bioloji yaş 12 parametrlə, o cümlədən qan təzyiqi, xolesterin, hemoqlobin səviyyəsi və ağciyərlərin funksiyası ilə ölçülüb.
Nəticədə məlum olub ki, müşahidələrin əvvəlində bioloji yaşlanma təxminən 3,7 gün sürətlənmişdi, amma iki ildən və 10 istilik dalğasından sonra bu göstərici 8–11 günə yüksəlib. Yəni ekstremal istilər bioloji qocalmanı 2–3 dəfə artırır.
Effektin miqyası kiçik görünsə də, nəticələr siqaret, alkoqol və azhərəkətli həyat tərzinin orqanizmə təsiri ilə müqayisə olunur. İstilərin təsiri iki ildə 0,023–0,031 il təşkil edib, zərərli vərdişlər isə 0,002–0,056 il.
Ən çox risk altında olan qruplar fiziki işçilər və kondisioneri olmayan insanlar olub. Onlarda istilərin təsiri əqli işlə məşğul olanlarla müqayisədə üç dəfə güclü müşahidə edilib.