3–6 iyun tarixlərində Rusiyanın Sankt-Peterburq şəhərində keçiriləcək XXIX dünyanın diqqət mərkəzində olan əsas iqtisadi tədbirlərdən biri hesab olunur. “Rusiyanın Davosu” kimi tanınan forum son illərdə yalnız regional deyil, qlobal iqtisadi və geosiyasi proseslərin müzakirə olunduğu mühüm platformaya çevrilib.
1997-ci ildən keçirilən forum 2006-cı ildən etibarən Rusiya prezidentinin himayəsi altında təşkil olunur. Tədbirin əsas məqsədi dövlətlər, iri şirkətlər, investorlar və beynəlxalq təşkilatlar arasında iqtisadi əməkdaşlıq üçün yeni imkanlar yaratmaqdır.
Bu il forumun “ExpoForum” sərgi kompleksində keçirilməsi planlaşdırılır. Təşkilatçılar bildirirlər ki, forumda dünya iqtisadiyyatında baş verən dəyişikliklər, enerji bazarları, logistika marşrutları, süni intellekt, rəqəmsal iqtisadiyyat və yeni maliyyə sistemləri əsas müzakirə mövzuları olacaq. Xüsusilə BRICS ölkələri və “Qlobal Cənub” adlandırılan regionların əməkdaşlığı gündəmin ön sıralarında dayanacaq.
Son illərdə Qərb-Rusiya münasibətlərində yaranmış gərginlik fonunda forumun xarakteri də dəyişib. Əvvəllər Avropa və ABŞ şirkətlərinin üstünlük təşkil etdiyi platformada indi Asiya, Yaxın Şərq, Afrika və Latın Amerikası ölkələrinin fəallığı artıb. Bu da forumu yeni iqtisadi blokların formalaşdığı mühüm mərkəzə çevirib.
Rəsmi məlumatlara görə, artıq onlarla ölkə forumda iştirakını təsdiqləyib. Çin, Hindistan, Birləşmiş Ərəb Əmirlikləri, Səudiyyə Ərəbistanı, Türkiyə, İran, İndoneziya və digər dövlətlərin yüksək səviyyəli nümayəndə heyətlərinin iştirakı gözlənilir. Təşkilatçılar forumun beynəlxalq əhəmiyyətinin ildən-ilə artdığını vurğulayırlar.
Ötən il keçirilən SPIEF 2025 isə rekord göstəricilərlə yadda qalıb. Forumda 144 ölkədən 24 mindən çox iştirakçı və media nümayəndəsi iştirak edib. Tədbir çərçivəsində 1000-dən çox müqavilə imzalanıb və müqavilələrin ümumi dəyəri 6,3 trilyon rubldan çox olub. Forum proqramına 350-dən artıq tədbir daxil edilib.
Ekspertlər hesab edirlər ki, forumun əsas əhəmiyyəti yalnız iqtisadi göstəricilərlə məhdudlaşmır. Burada dövlətlər arasında strateji əməkdaşlıq, enerji təhlükəsizliyi, nəqliyyat dəhlizləri və yeni bazarların formalaşdırılması kimi məsələlər də müzakirə olunur. Xüsusilə Şimal–Cənub və Orta Dəhliz layihələri fonunda Avrasiya məkanında yeni logistika xəritəsinin formalaşması forumun diqqət mərkəzində olacaq.
Azərbaycanın da forumda iştirak edəcəyi gözlənilir. Azərbaycan son illərdə SPIEF-də mütəmadi təmsil olunan ölkələrdən biridir. Rəsmi Bakı üçün forum xüsusilə enerji ixracı, logistika, tranzit imkanları və investisiya əməkdaşlığı baxımından önəm daşıyır. Azərbaycan nümayəndələrinin forum çərçivəsində enerji, nəqliyyat və ticarət sahələrində ikitərəfli görüşlər keçirməsi gözlənilir.
Mütəxəssislərin fikrincə, hazırkı qlobal iqtisadi parçalanma dövründə SPIEF kimi platformalar yeni iqtisadi münasibətlərin formalaşdırılması baxımından xüsusi rol oynayır. Forum həm də müxtəlif ölkələrin Qərb maliyyə sistemindən kənar alternativ əməkdaşlıq mexanizmləri axtardığını nümayiş etdirən əsas beynəlxalq tədbirlərdən biri hesab olunur.
10292 views