“Əmək pensiyaları haqqında” Qanuna edilən dəyişikliklərə əsasən, Azərbaycanda müəyyən kateqoriyadan olan əmək pensiyaçılarına aylıq sabit pensiya əlavəsinin verilməsi nəzərdə tutulur.
Sosialmedia.az Metbuat.az-a istinadən xəbər verir ki, bu barədə deputat Vüqar Bayramov sosial şəbəkə hesabında məlumat paylaşıb.
Son günlər aylıq pensiya əlavəsinin kimlərə şamil olunacağı və məbləğinin necə müəyyənləşdiriləcəyi ilə bağlı müzakirələr aparılır. Qeyd edək ki, qanunvericiliyə edilən dəyişikliklər Milli Məclisdə qəbul olunub. Onlar Azərbaycan Prezidenti tərəfindən imzalandıqdan sonra qüvvəyə minəcək.
Dəyişikliklərə əsasən, aylıq pensiya əlavəsi əmək pensiyası yaşına çatmış və ya bu yaşa çatanadək orqanizmin funksiyalarının 81–100 faiz pozulmasına görə əlilliyi müəyyən edilmiş müəyyən kateqoriyadan olan əmək pensiyaçılarına şamil ediləcək.
Aylıq pensiya əlavəsi kimlərə veriləcək?
Sabit pensiya əlavəsinin aşağıdakı kateqoriyalara aid şəxslərə şamil edilməsi nəzərdə tutulur:
- Azı 15 il qulluq stajı olan sabiq Birinci vitse-prezident və vitse-prezidentlərə;
- Baş nazirə və onun müavinlərinə, Naxçıvan Muxtar Respublikasının Baş nazirinə və onun müavinlərinə;
- Azərbaycan Prezidentinin səlahiyyətli nümayəndələrinə və onların müavinlərinə;
- Mərkəzi icra hakimiyyəti orqanlarının rəhbərlərinə və rəhbər müavinlərinə, eləcə də müvafiq Naxçıvan Muxtar Respublikası orqanlarının rəhbərlərinə və müavinlərinə;
- Yerli icra hakimiyyəti başçılarına;
- Müvafiq media və yayım şuralarının üzvlərinə;
- Qanunvericilikdə nəzərdə tutulan şərtlərlə sabiq dövlət qulluqçularına;
- Səlahiyyət müddətinin azı yarısı qədər sığorta stajı olan sabiq deputatlara;
- Eyni staj şərtini ödəyən sabiq Hesablama Palatası üzvlərinə;
- Müvafiq şərtlərlə sabiq ombudsmanlara;
- Mərkəzi Seçki Komissiyasının və Naxçıvan Mərkəzi Seçki Komissiyasının müvafiq sığorta stajına malik sabiq üzvlərinə;
- Diplomatik rütbə nəzərdə tutulan vəzifələrdə çalışmış və ümumilikdə azı 15 il qulluq stajı olan sabiq diplomatik xidmət əməkdaşlarına;
- Müdafiə Nazirliyinin qanunvericilikdə nəzərdə tutulan kateqoriyaya aid hərbi qulluqçularına.
Beləliklə, dəyişikliklər bir sıra dövlət vəzifələrində çalışmış şəxsləri əhatə edir. Pensiya əlavəsinin təyin olunması zamanı müvafiq vəzifə, qulluq və sığorta stajı tələbləri nəzərə alınacaq.
Pensiya əlavəsinin məbləği necə müəyyənləşəcək?
Deputatın paylaşımına görə, sabit pensiya əlavəsinin məbləği müvafiq icra hakimiyyəti orqanı tərəfindən müəyyən ediləcək və dövlət büdcəsinin vəsaiti hesabına ödəniləcək.
Qanunvericiliyə edilən dəyişikliklər qüvvəyə mindikdən sonra aylıq pensiya əlavəsini təyin edəcək qurumun və ödəniş qaydasının müvafiq sənədlərlə müəyyənləşdirilməsi gözlənilir.
Qeyd: Pensiya əlavəsinin konkret məbləği və tətbiq mexanizmi barədə yekun məlumatlar müvafiq hüquqi sənədlər qüvvəyə mindikdən sonra dəqiqləşəcək.
63 views